eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos kontara en esta seksion sovre “Uzos i Kostumbres de los Sefaradís en Turkia”, ande mos va a avlar sovre el siklo de vida empesando por el kazamiento i todo lo ke esta atado a este evenimiento: ashugar, banyo de novia, ketuba i mas…i despues paridura, fashadura… i ansi asta la fin de la vida. Komo lo dize el refran: “De la fasha a la mortaja” (de la faja a la mortaja).
APARAR EL ASHUGAR
Siendo ke oy, en este mundo moderno ke estamos biviendo, kuando todo se merka pronto en los grandes magazenes i los sentros komersiales, los uzos de aprontar el ashugar i menos ke esto de apararla ya desparesieron kompletamente i ya no existen mas desde largos anyos, ma tornaremos al pasado a las kustumbres ke ya no son mas ke una nostaljia..
Pokos dias antes de la boda, en la kaza de la novia, tenia lugar una seremonia muy espesiala: la de aparar el ashugar.
En este dia se ekspozavan kon grande orgolio, sovre las mezas i las kamas, todos los takumes – todo lo ke azia parte del ashugar: los manteles brodados, las savanas, las tevajas i la blankeria de la novia. Todo bien lavado i enkolado i atado kon kordelas de kolor.
En una de las kamaretas se atava una kuedra, de una pared a la otra, sovre la kuala se enkolgavan los fostanes, paltos, kostumes i otra vistimienta mas. Klaro ke todo el ashugar dependia de la situasion ekonomika del padre de la novia, ken mas i ken manko.
Sovre todo se echava drajes i bonbones i naturalmente ke las bendisiones tambien no mankavan: para gozar ke sea; bueno ke pasen; siempre alegres i gustozos; ke la alegria no manke de sus kaza, son algunas de eyas.
I ken en eran envitados a esta seremonia? Jeneralmente las mujeres de la
famiya i en primer lugar la esfuegra ke kontrolava i mirava kon vente i kuatro ojos si todo era de buena kalidad, tokando las ropas i kontando el numero de fostanes para estar segura ke el akordo ya fue kumplido.
Es djustamente en este dia ke aparesia el presiador, ke su mision era de komparar la lista ke tenia en su mano kon todos los artikolos del ashugar i kon lo ke estava aparado en las kamaretas.
Devemos apuntar, ke en siertos kavzos, bodas fueron anuladas siendo ke el padre de la novia no avia reushido a kumplir su parte en el akordo i dar a su ija todos los artikolos ke avia prometido, jeneralmente por razones ekonomikas. 
Despues de la seremonia todo el ashugar se metia en bogos brodados ke se pozavan alientro de baules muy ermozos, ornados kon oro i plata i motivos muy sovresalientes, i se embiava a la kaza del novio, segun era de uzo en akeya epoka, ande la rezin kazada empesava en un mueva vida, entornada de su esfuegra i esfuegro, kunyadas i kunyados, si ainda eran solteros i bivian en kaza de sus padres. A esta regla avia eksepsiones tambien i en siertos kavzos, i si esto se desidia de antes, era el novio ke vinia a bivir en la kaza de la novia por un periodo de uno o dos anyos i mizmo mas, asta ke su situasion finansiaria se enrezyava, avansava un poko de paras i puedia mantener a su mujer i sus kreaturas sin averguensarse. Esto se yamava meza franka.
Zelda Ovadia
Sigo diciendo todas las semanas: cuantos recuerdos al leer el boletín e Sefarad!!! Justamente la costumbre de mostrar el ajuar la he visto una solo vez en mi vida: fue cuando mi hermana Susana, mayor que yo, creo que fue en el año 1957, realizó su boda aquí en Buenos Aires.- Yo era pequeña y todo me parecía muy raro: sábanas y manteles colgados en cuerdas, repasadores bordados, si se bordaban los repasadores con motivos de cocina, toallas y toallones, cubre camas.-Todo eso se mostraba a parientas, amigas, futuras cuñadas y por supuesto suegra, con el consiguiente convite de cosas ricas, tales como baklava, cadaif, mogados, mostachudos, etc.- Ahora, leyendo este artículo vuelvo a recordarme de todo ello, que insisto para mí era muy, pero muy extraño.- Gracias por tantos recuerdos!!!