eSefarad Noticias del Mundo Sefaradi
Por Rachel Saba-Wolfe
A’haron de Yosef Hazan apenas tenia 20 anios, kuando empeso a puvlikar el jurnal La Buena Esperansa en 1871 en Izmir. Este jurnal, ke aparesio durante 46 anyos, estava siempre en la primera linea de la lucha por el progreso i adelantamiento de la komunidad.
¿Ken era este distinguido mansevo ke no ezito de kargarse la enorme responsabilidad de trokar los uzos i kostumbres de la vida tradisyonala de los Djudios de Izmir? Puede ser ke en parte podemos topar la repuesta en su famiya de orijin: A’haron de Yosef Hazan era desendiente de una famia ilustre de rabinos, eruditas i poetas.
Su bizpapu era ribi Refael Yosef Hazan ke eskrivio los livros Hikrey Lev i ke en ora de estrechura, durante un pleto kon los rikos, dio «pesak» (sentensia) favorizando los povres. Su papu era el famozo ribi Haim David Hazan, el rabino i el giador de los proves en el tiempo de «Shaavat Aniim». Su ermano, Behor Eliya Hazan, era el gran rabino de Ayifto.
A’haron de Yosef Hazan era ombre de integridad i de alto intelekto. El estava konvinsido ke el modernizmo va amijorar la vida de los Izmirlis, espesialmente los mas proves i atrazados. Ama, el respektava tambien el Djudaizmo i los rabinos i bushkava de tener sus apoyo.
Durante 50 anyos ensenyava la lingua Turka en el Talmud Tora i en la Aliansa. Aya deskuvrio, ayinda en su mansevez, la kantidad de inyorensia, superstision i provedad ke predominaron la komunidad, i desidio de luchar para terminarlas. 25 anios mas tadre, en la edision espesiala de La Buena Esperansa el deskrivio akel estado en estas palavras:
«Nuestro periodiko salyo a luz, kuando el sielo de nuestra komunidad era kuvierto de nuves espesas». Segun el, la komunidad «mankava de todo establesimiento seriozo de instruksion».
El konsilio komunal fue mal organizado i los pletos «nos arrebashavan» en los ojos de los Turkos. Ademas, «los uzos i espirito sosial no armonizavan kon los menesteres» de la epoka.
A’haron de Yosef Hazan tenia un model de vida moderna ke aspiro sus ideas: «El eshemplo de nuestros ermanos de Evropa» ke el kijo seguir. El demando del konsilio i de las sosiedades de bienfezensia de azer reformas, de destinar los manaderos fiskales a eskopos mas umanitarios i utiles. Tambien bushko remedio komo arrekojer paras para una eskola moderna. La komunidad se auno en adelantando un proyekto komunal ke sus profitos fueron destinados a la eskola : kerian fraguar un mulino de arina, bazado sovre vapor, i una fabrika de masá [matza]. Malorozamente, este proyekto no tuvo sukseso.
A la fin, Ribi Avra’ham Palachi, el Haham Bashi de Izmir ke sostenia la idea de la eskola, demando del konsilio de kontribuir kon moneda, i ansi izieron. En 1873, se avrio la eskola, patronada por la Aliansa i sinior Aleksander Sidi fue su direktor.
A’haron de Yosef Hazan no era solo en su lucha: lo ayudaron otras personas i filantropes komo Aleksander Sidi, Madam Dudu de Polako, Haim Habif, Ye’huda Sid, Behor Danon i mas. Djuntos, reusheron a realizar sus buto. Ke instrumento les servio en esta lucha? I ande era la frontiera? Segun A’haron de Yosef Hazan, su jurnal era «un chiko instrumento del progreso», kere dezir ke la frontiera se espandio en las ojas de la La Buena Esperansa … En verdad, la prensa en Izmir tenia un rolo muy importante, en trayendo los trokamientos i los movimientos del modernizmo a la vida de los miembros de la komunidad.
Conferencia del primer Salon de Ladino de la sezon 2009-2010
Fuente: Bülten de la Hitahdut Yotsey Turkiya
Imagen: Revista Maguen
Estimada Rachel,
Buen articulo e interezante,,,
Yo sé que mi abuelo era Rabby Habif casado con Allegre Codrón.
Si tiene alguna informacion al respecto,, seria de gran ayida.