eSefarad Noticias del Mundo Sefaradi
Por Selim Salti
La persona kon su karizmo i su diskorso populisto fue kapache de endoktrinar miliones de turkos en TurkiyaI i en Evropa , krear un oto totalitarizmo en mirando de eliminar en parte los prensipios del kemalizmo enonsados por Ataturk i sus opozantes politikos. Esto mirando ansina a deskrivir a Recep (se melda´´ redjep´´) Tayyip Erdogan aktual prezidente de la republika Turka, en poder en el payis dizde 14 anyos. Este sinyor de orijin Laz nasido en el kuartier de Kasimpacha en Estambol, se engrandesyo en una famiya prove, ma fue kapache de adelantar en su manseves i de estudiar la relijion muzulmana en un liseo ke forma imames i en una alta eskola de ekonomiya . El tuvo konosensiya de la Komunidad djudia de Estambol i mizmo tuvo amigos djudios ke estudiaron kon el , kon los kualos tiene dainda relasyones.
Dekorado i primado munchas vezes el sinyor fue elijido ser el mayor de Estambol antes 22 anyos perioda en la kuala fondo el partido politiko AK (justisya i dezvelopamiento) despues ke se alesho del fondamantalisto musulmano Erbakan, personaje radikalmente opozado a Ataturk i destituado de su prezidensya parlamenteria por la armada de su payis . Ma malgrado esto la doktrina politika de Tayyip kontinuo a ser la mizma de akea de´´ Los Ermanos Musulmanos´´de Erbakan. Esto es una de la razones de su antisemitizmo i anti-israelizmo ke el aplika oy en dia. Este sinyor es un fervante amigo del Hamas i no lo guadra. Razon por la kuala las relasyones politikas i diplomatikas entre Israel i la Turkia están al mas basho nivel . Solo las relasyones ekonomikas están bien por la simple razon ke la Turkia nesesita ke Israel le da pasaje a sus eksportasiyones a los payizes del Golfo, el solo kamino egzistente dezde la gerra en Siria.
La Turkia es el uniko payis en el mundo muzulmano ke se dezvelopo sovre la impulsyon de su rejimen republikano endoktrinado sovre los modos oksidentales ,a tener una fuerte industria i una ekonomia relativamente stable, a dezvelopar el komersyo i el turizmo en un atmosfera kaji libero en sigiendo los prensipyos universales de la justisia. Oy este payis de 82 milyones de abitantes a 99 porsiento muzulmano kon una kostitusyon laika devria servir de model al mundo arabo. Ma lo ke vemos es justo el kontrariyo, los dirijentes arabos en mayoriya kontradizen esta idea de dezvelopamiento ke les asemeja kontra sus uzos de vida i de sus interesos politikos. Ademas ven en el model un muevo Otomanizmo pushado por el governo de Tayyip. No se alvidan ke durante 400 anyos los turkos los kolonizaron i los sumetieron a pagar dasyos imposibles al Saray del sultan turko. Es ansina ke la Turkiya aktual a la eksepsyon del Katar protektor de los Ermanos Musulmanos, no le kedo relasyones amigavles kon el mundo sunnito muzulmano. En la kriza ekonomika aktuala en la kuala se topa este payis, es el Katar el solo payis arabo ke le viene en ayudo para salvarlo de una fayita muncho mas grave de akeya de 2008. La lira turka en Agosto de este anyo peryo mas de 30 porciente de su valor. Yerro en riva de yerro la administrasyon turka dirijada por una klik de inkompetentes amigos de Tayyip gasto miliardas en investisyendo en una infrastruktura ke el payis no nesesitava urjentemente. La Turkia por esta razon deve al mundo miliardas de dólares i no save komo salir de este kalejon sin salida. Ademas Tayyip se fraguo palasyos i gasto un mabul de dinero para su konfor. El rovo i los bahshishes del doredor por demazia. Todos los ke lo kritikaron por esto están oy en prezo. Kon los anyos el deroko la esensia de la armada i de la prensa i ansina miro de atabafar todo modo de kritika a su sujeto i a akeya de su governo. Tayyip mira al modo de Putin de kedar en pueder munchos anyos, eske reushira, kestyon a responder en el futuro.
De otro lado este sinyor esta en mal kon la Evropa Unida la kuala no kere sintir avlar de una integrasyon de la Turkia en su seno . Ma lo mas dramatiko es la situasyon aktual desgradada kon los Estados Unidos akuzada de protejar a Fettullah Gulen el pretendido instigador del kolpe de estado ke no reucho en Julio 2016 kontra Tayyip. Esta kriza se dezvelopa de una manera danjeroza porke Tayyip emplea esta karta de inimista kontra Trump i lo akuza de komplotar sovre la ekonomia de su payis. Sin duvda i Israel tomara su parte de akuzasyones de apartheid i de krimen kontra los palestinianos, propaganda ke lo rendera interesante en el publiko muzulmano. .
El governo turko en grande difikulta para reglar el diferente kon los Estados Unidos, tiene por supuesto de reglar de una parte la kestyon del proseso del vice presidente de la banka Halk en prizyon en los Estados Unidos i de la otra de mirar komo liberar el papaz amerikano detenido en Izmir i ansi tomar de mano a la administrasyon amerikana.
Los apuyantes de Tayyip ke la mayoriya son de klasas inferiores de la sosieta les gusta asosiar Israel i los Estados Unidos en lo ke yaman el komploto Amerikano-sionisto. Una grande animozita egziste entre eyos, sovre todo ke la ekonomiya aktual esta en grande mal. Por esta razon la situasyon de la Komunidad djudia de Estambol no esta en un estado normal, razon ke pusha a los djudios del payis desendientes de antepasados ke bivieron en la tierra turka dezde milanyo, a tomar suditansas espanyolas, portugezas o israelianas para poder si posible protejarsen de una inimista non kontrolada . La istoria de la republika Turka mo lo akodra.
Selim Salti
