Prinsipiamos el programa kon la notisia de la muerte de la Reina Isabel II de Inglaterra, ofresemos un omenaje a su figura y vos kontamos sovre su vida.
En la entrevista kontamos kon Jaime Moreno Bau, ke komo muevo Direktor de Centro Sefarad-Israel mos avla de su lavoro al frente de esta Institusión, en varias Embajadas en el ekstranjero, ansí komo su lavoro en la Embajada de España en Tel Aviv entre 2016 y 2019 komo responsavle de Asuntos Consulares, Culturales y Administrativos de la mezma i su responsavilitá en la konsesión de la nasionalitá espanyola a los deshendientes de los sefardim. Jaime Moreno Bau konta kon la Doble Licenciatura en Derecho Hispano-Francés por las Universidades Complutense de Madrid i Sorbona de París, prinsipiando en la Karera Diplomátika en 2006.
Jaime Moreno mos informa anchamente de toda la programasión kultural de Centro Sefarad-Israel estos días i en todo el mes de septiembre.
En Patrimonio muzikal ofresemos el kante «Morenika» en la versión de la kantadera Fortuna.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.