eSefarad Noticias del Mundo Sefaradi
Ver todos los artículos de esta sección
Mozotros, los sefaradim, tenemos la data de 1492 komo eskulpida i gravada sovre las palmas.
Ma, oy avlaremos sovre un fenomeno istoriko kaje inkomparavle: sovre una chika komunidad judia, ma bien aktiva, ke egzistyo i turo a bivir algunos 150 anyos en territoryo espanyol, DESPUES de la expulsion de Espania.
Ande? – en la sivdad de Oran.
Kuando? – entre el anyo 1509 asta 1669.
La sivdad de Oran es una sivdad a la kosta de la mar Mediterranea, en el oeste de Aljeria, serka de la frontierra de Maroko, i muy muy serka a la kosta de la peninsula iberika.
Oran fue estabilisida en el diezen siglo por komersiantes de Andalusia, fue anexada al reynado grande de TLEMECEN, i desde el anyo 1437 fue el porto sentral del paiz.
La atitud de los governadores de Tlemecen verso los judios, era mucho mas tolerante, al menos mijor de la atitud de los Muwahadin (los governadores anteriores de Oran).
Los Muwahadin eran musulmanos fanatikos, a no dizir salvajes, ke reynaron en muchas partes del norte de Africa, i tambien en Espania.
Es solo en la rekonkista de Toledo en 1212, ke los espanyoles reusheron a rempushar i echar el Muwahadin del paiz.
Los de Tlemecen ofresieron a los judios de instalarsen en el espasio de sus reynado, al pareser ya del siglo 14.
Ma, por mas seguro, ay referensias i dokumentos sovre komunidad judia en Oran desde el anyo 1391.
En akel anyo yegaron a Oran refujiados/muadjires judyos de Espania. Savemos sovre korespondensia entre Rabi Amram ben Maravias Efrati de Valencia, i el Rav Yitzhak Bar Sheshet (Rib»ash 1326-1408), ke tambien desho su sivdad natal (Barcelona) i paso a bivir en Aljeria, (en otra sivdad).
Otro nombre famozo ke mos aparese en esta situasion, es Rabi Shimon ben Zemah Duran (Rashba»TS. 1361-1442), de Mayorca, ma bivio unos kuantos anyos en Aragonia, i en akeos pogromes de 1391 tuvo de fuir a pie deskalso a Aljeria.
Asta el anyo 1509 bivieron los judyos en Oran basho un dominio musulmano.
En 1509, Espania konkisto a la sivdad de Oran, i los judyos (komo los musulmanos tambien) se vieron ovligados de abandonar la sivdad, aunke por muy kurto interval….
Parese aki komo la fin de la istoria, ma no. Ayinda no komensimos el empesijo.
Tenemos antes de todo aklarar i deskrivir el fondo de la kolonia kristyana en Oran i komo es ke kresio una komunidad judia en esta sivdad.
La prezensya espanyola en Oran desde el siglo 16 asta el siglo 18 era un akto de kolonializmo, ma en tierras bien konosidas, las territorias de un enemigo de kuando, vizino de Espanya de muchos siglos. En realidad, esto fue komo una kontinuasion direkta de la rekonkista kristiana kontra el Islam en propia Espania. Espesialmente podemos notar los diez anyos de gerra kontra Granada (1482 asta 1492).
Esta viktoria, en konkistando a Granada, evoko a los reyes katolikos de desbarasarsen de los Judyos, esta UMA ajena i estranya; ma ayinda mas, el entuziazmo pusho a los espanyoles de krear inisiativas militaras kontra los vizinos en Berberia (ke ansi se yamavan en akel tiempo las territorias del Norte Africa).
Me gusta yamar a estos aktos de gerra, komo: «ofensiva defensiva», un poko komo era el entendimiento de ZAHAL asta el anyo 1967.
Lo mas de estas konkistas espanyolas (Aljeria, Tunisia, etc.) no turaron mucho.
Kon la exepsion de la rejion de Mars el Kebir i Oran.
Komo ya lo dishimos, AKI se infinko la Espanya por kaje dos siglos.
Por akodrarvos, Oran fue konkistada en 1509 en un atako supetaneo por la armada espanyola enkavesada por Fransisco Sisneros, ke era tambien el obispo de Toledo, i el vezir preferido del rey Fernando de Aragon.
Apropo, sinko anyos antes, se enbivdo Fernando de su mujer Izabel de Kastilia.
No savemos si sus desiziones politikas eran agora diferentes sin los konsejos de la reina.
Ma, tornaremos a la sivdad de Oran.
A mi, no me sorprendio de nada a saver ke las negosiasiones por la redisyon de la sivdad tomaron lugar entre Fransisco Sisneros kon un buen judyo de la famiya Satora, ke biviya en Oran.
De los dokumentos espanyoles de akea epoka savemos por un kuartier judyo al lado de la Kasba, i –aparte de la famiya Satora- se nombran tambien las famiyas de Kansino i Zamiro.
De toda manera, el fato es ke las muevas autoridades espanyols no teniyan ningun adjele, diziremos ansina, a expulsar a los judyos.
Al pareser ke el Kardinal Sisneros kontinuo la politika uzada en Espanya en los tiempos de la Rekonkista de enkorajar djente (naturalmente, inkluye judyos) de vinir i instalarsen en las sivdades ke eran vaziyas de los enemigos vensidos.
En los primeros anyos de la prezensia espanyola, funksionaron Avraham Zamiro i Yitzhak Kansino komo ambasadores del rey de Tlemesan. Otros judyos eran reprezentates de komersio o delegados de algunos otros princhipes en la rejion.
Los kastilianos ke entraron a Oran no se interesaron a saver o apartar entre sivdadinos judyos nativos, o ke 18 anyos antes fueron expulsados de Espanya.
En jeneral podemos supozar, ke afilu muchas dekadas antes de la konkista de Mars el Kebir (1507), i de Oran, dos anyos despues, ya avian kontaktos de komercho entre los portos de Malaga i Valencia kon el reynado de Tlemesen. La enemistad entre los paizes, no impidio al «business».
Es kuryozo, ke despues de la konkista espanyola de Mars el Kebir, se agrearon las relasiones entre los judyos i los musulmanos, los kual akuzavan a los judyos komo si eran adjentes de los kristyanos.
Los judyos son siempre kulpavles.
Es kuryozo (o no es kuryozo) ke en el anyo 711, okurio la invazion musulmana enkavesada por el jeneral Tarik Ibn Ziad al reynado kristyano de los Vizigotes en Espanya. Ayi, los judyos fueron akuzados ke fue esta una invazion enkomendada, i afilu apoyada, por los judyos.
Bien entendido, ke la sivdad de Oran, en mano de los espanyoles era antes de todo una fortresa kon algunos 1500 askieres, el guarnision de la sivdad.
Oran fue tambien «kolonia penal», i aki egziliavan djente komo una parte de su kastigo.
Afilu en Israel se uzava de vez en kuando esta manera de kastigo, i Elat fue asta pokos anyos muestra «kolonia penal».
De punto de vista militara la egzistensia de Oran, no era deltodo lojika: una kolonia en lugar peligrozo, ke su espalda a la mar, i muy dependiente a rekorsos de Espania. Ma yene, aki biviyan algunos 4000 sivdadinos sivil, mas de 1000 esklavos musulmanos, i tambien la komunidad judia ke kontava entre 400 a 500 almas.
Malgrado el karakter militar de la kolonia, los dokumentos istorikos mos dan a saver, ke muchos de los sivdadinos kristyanos eran nasidos en Oran, i pasavan ayi toda sus vidas sin afilu pizar en tierra espanyola.
Lo kuryozo es ke durante mas de 150 anyos, ombres, mujeres i kriyaturas kristyanos biviyan en kontakto kotidyano kon judyos, i krearon komo una sosiedad komun.
Los judyos se instalaron en Oran sin ke teniyan un permiso eskrito ofisial, aunke eran konsiderados komo «los vasales del Rey».
En ebreo ay una expresion ke dize «para no amojarse en la luvya, ay de kaminar entre las gotas».
El estatuto de Oran era bien komplikado:
La sivdad i el guarnision eran siempre basho la autoridad del governador jeneral.
El governador era giado i kontrolado por el Konsilio/Konsejo de la Gerra en Madrid.
Aparte de esto aviya un konsilio munisipal, ke se adjuntava regularmente para arreglar kestiones de la vida kotidyana de los sivdadinos.
Los miembros de este konsilio munisipal eran basho la autoridad del Tribunal Supremo, i del Konsejo (konsilio) de Kastilia.
Tan komplikado todo, ansi ke afilu la djurisdiksion de la Iglesia era diferente i espesial. Era kontrolada direktamente mezo el Tribunal del Obispo (archi-Bishof) de Toledo.
Esto kedo del tiempo de Fransisco Sisneros (vos akodrash?) ke era el obispo de Toledo.
En este alboroto, kuando a vezes «la mano derecha no save lo ke aze la istiedra», los judyos (konosiendo bien los misterios de la administrasion) savian manuvrar, i topar kaminos, kontaktos amigavles, o poderozos, para profitar i enderechar las kozas.
Afilu sin ningun dokumento ofisial, el fato ke los judyos biviyan en la sivdad desde la konkista espanyola, i afilu antes, les dyo este estado de «Vasales del rey», i eran (de punto de vista juridika) basho la autoridad real. En otras palavras, djente (judyos o tambien musulmanos), aun ke no eran kristyanos, teniyan el Zehut, el derecho de pedir, de demandar, djustisia, direktamente del rey.Sozde el rey suyos.
Vos dare aki un egzempio ke reflekta la proteksion del rey a sus vasales:
En el mez de junio 1527 se adresaron unos kuantos komersyantes judyos de la sivdad de Oran al Konsilio Munisipal i al Correjidor (el reprezentante del rey en el konsilio), i demandaron djustisia.
Porke? Ke akontesyo?
Estos komersyantes judyos izieron muchos negosios kon komersiantes kristyanos, tambien de Oran. Ma los kristyanos nyegaron de pagarles lo ke les reveniya. Eyos, los kristianos, (kon sus maldad) profitaron del fato, ke el permiso ke se les dyo a estos judyos de lavorar en Oran ya paso la data de su validitad. Expirado.
Ma, ya mos disheron de viejo ke «judyo bovo no ay». Los komersyantes judyos reusheron resivir del rey Carlos el Sinken prolongamiento del permiso de bivir en Oran, i ansi lograron de rekavdar las paras tambien.
Kon el tiempo, i otros judyos aparte de los judyos orijinarios de la sivdad, obtuvyeron permisos temporales por ser komersiantes o algun otro ofisio nesesario.
Podemos dizir ke por kavzo de la utilidad, las varyas autoridades akseptaron ke una komunidad judia kreska i enfloreska adientro de una sivdad kristyana.
En grande parte esto fue «a posteriori», o un rekonosimiento «de Fakto».
Ansina o ansina, no ay trankilidad kumplida en la vida de los judyos, ke teniyan de estar siempre alertos i defender sus derechos.
En diferensia de los judyos o los konversos en la Espanya kristiana, la komunidad judia en Oran pratikava la relijion judia aviertamente. I malgrado ke era una chika komunidad, ay muchos testimonios ke los judios de Oran mandavan kontribusyones a las komunidades proves en Erets Yisrael, i tambien azian kojetas para rigmir judyos de mano de piratas i korsaryos.
La pozision ekonomika de los judyos de Oran era muy buena, i lo mas de las famiyas judias posesavan esklavos musulmanos.
Por sus konosimiento de linguas, i espesialmente las linguas kasteyano i arabo, teniyan komersios kon Espania i kon los paizes de Nort Africa (Berberia).
Unos kuantos de eyos, por los kual avlaremos un poko mas despues, estavan en el servisio de los governadores espanyoles, i de otros personajes importantes.
Por seguro ke avian i musulmanos o otros ke eran tambien eruditos i savientes de lenguas. Este fato, pusho a los tradjumanes judyos de perkurar mas i mas para salir abash i elevarsen ensima de sus kompetidores.
Ayinda mas: me viene al tino el kavzo de Yosef, el ijo de Yaakov Avinu, ke lo yamaron delantre de Paro a soltar, a intrepretar, los suenyos del rey.
Yosef no se akontento en dizirle a Paro ke las siete vakas flakas son siete anyos de ambre i Aniyut, ma en el mizmo soplo le disho: «la koza es sierta, i el Dio se apresura de azerlo. Esto i esto ay de azer en los anyos de artura, etc. etc.»
Dunke, el talento de los traduktores judyos (ansi me parese) era de dar su konsejo bueno para rezolver problemas, i no ser solamente un teknisien de traduksiones.
En las listas de alkunyas de los judyos de Oran sovresalen los sigientes:
Kansino, Sasportas, Satora, Azulay Navarro, Albo, Molho, Uziel i Al Hayek (Mas ke seguro ke Al Hayek era orijinario de algun pais arabo).
En una lista de un prestimo ovligatorio del governador, topamos -una vez mas- a estas alkunias renomadas.
Los dokumentos espanyoles de akea epoka inkluyen un monton grande de korespondensia de judyos de Oran
a los governadores, a los konsilios del Estado, al Konsilio de la Gerra, i mas.
Estos manaderos mos amostran muy bien la forma ke los judyos savian reprezentarsen, i sus relasiones kon aliados i kon rivales.
Por egzempio, un livro ke publiko Yaakov Kansino en Madrid, i en el livro el konta i rekonta los servisios ke el i su famiya konsederon al rey. De una parte, este livro mos da a saver mucho sovre sus aktividades, ma en publikando este livro kijo Yaakov Kansino a konvenser a los personajes importantes de Madrid a depozitar el posto de tradjuman en sus manos i no en manos de la famiya de Sasportas.
El Prof. Meir Benayahu (1926-2009) ke investigo manaderos (fuentes) judyos de la istoria de Oran, eskrivio ke «de los dokumentos mos aparese un imajen feo de djente ke perkuran de aserkarsen a las autoridades, Hanefes, yenos de flateria, i ke no les importa arrebasharsen».
Me parese ke el Prof. Benayahu egzajero mucho kon su kategoria. La rivaldad entre Kansino i Sasportas, por la kual avlaremos un poko mas despues, no me sona muy diferente de lo ke pasa en kualkier sosiedad en el mundo, i en todas las epokas. Yo diriya ke los lideres de la komunidad Judia de Oran mos amostran ke eran djente ke saviyan dirijirsen en la politika komo en la sosiedad i en los negosyos.
Si no tienes kovdos komo puedes rempushar i salir adelantre?
La rivaldad i la kompetision entre las famiyas Kansino i Sasportas, los lideres de la komunidad judia, kontinuo todas 150 anyos de la egzistensia de la komunidad en Oran.
Ma, de toda manera, no era komo la enemistad entre las famiyas de Romeo Montaggio i Julia Capuletti. Meldamos ke «business business – mosas mosas». Avian i kazamientos entre estas dos famiyas nobles.
Ma, ayinda mas, en kozas ke konsernan al bienestar de la komunidad avia entre los dos lideres – lo ke yo yamava : «una coopetision».
Me esto alkudeando mucho sovre los miembros de estas dos famiyas renomadas, ma no Has veShalom komo una meshilikeria (o dedikodu, en turko), ma una refleksion (un mikro-kosmos) de toda la pekenya komunidad judia en Oran.
Vos kontare sovre un evento, un konflikto kon el Obispo de Toledo, en el empesijo del siglo 17.
Los obispos de Toledo, de Salona i de Troya, todos djuntos ordenaron al Rav Avraham Kansino i al Senyor Yehu Sasportas de azer las sermonias de las levayot (funerales) – leshos de todos mozotros- sin mucho exhibisionismo. Kaje a la kayadez.
No vo entrar a detalios, ma frente esta demanda de los obispos se defendieron los dos muestros, bazandosen a los privilejios juridikos, diziendo:
«komo nativos del lugar, i komo sivdadinos kon permiso de mantener las Mitsvot de muestra Tora, inkluye sinagoga i orasiones en publiko, celebrasion de Shabat i fiestas».
En la kontestasion de defensa avian muchos detalyos sovre la seremonia del funeral, ke no mos interesa.
No. no mos interesa.
Ma solamente por kuryozidad, vos dizire ke la kostumbre de los judyos de Oran era de azer una pauza para deskansarsen del largo kamino asta el Bet aHayim, dizir Tehilim i tanyer el Shofar. Si. Shofar. «para akodrar a todos ke semos mortales i ke tenemos de akavidar a no pekar i no anular muestras reglas de la Emuna».
Los observadores kristyanos de Oran savian muy bien ke sovre la komunidad judia dominan dos famiyas grandes: Kansino i Sasportas. Las dos eran venidos de Espanya. La primera de Sevilia, la segunda de Barcelona.
Aki vos traygo dos paragrafos de un raporto del anyo 1630, ke eskrivio el Vicario (kiere dezir el papas) Don Pedro Cantero Vaca sovre estas dos famiyas:
«»»Kansino Yaakov es traduktor del arabo en el servisio de Su Majestad en estos PRESIDIOS. (presidio es sivdad rodeada kon muraya i fortrezas). Ayi, su sovrenombre es «el Haham» porke es un ombre erudito i por su desendensia de famiya onorada. Entre los judios el es el mas eminente de todas sinko famiyas ke se instalaron de kuando en Oran.
I en varyas opurtunidades el me avia kontado ke los de Kansino no eran embolvidos en la krusifikasion de muestro salvador (Jesus), porke en akea epoka biviyan en Toledo…
El judyo Yehu Sasportas es el mas apresiado de todos, ambos por los judyos i los kristyanos. Tambien los jenerales de Su Majestad, ke le konsedieron muchos favores por sus muchos servisios ke el atorgo (al rey) i prestimos de su propio kapital (dinero).
A mi mizmo (disho el papaz) me ofresio sumas de moneda a uzarlas para elevasion de las almas de algunos kristyanos ke eran sus amigos ke murieron.»»»
Asta aki la sitasion.
Apropo, en 1628, presedio el Conte de Santa Clara al ijo de Yehu Sasportas el titolo: «El kapitan de los judyos ke biven en el presidio».
Dunke, Yaakov Sasportas komandava sovre algunos 20 soldados judyos, i resiviya salario/mezada del rey.
I na otro un apropo, en tornando a otro un raporto ke eskrivio el mizmo Vikario (Pedro Cantero Vaca). Ayi topi un detalio ke me sorprendio:
«»»Las mujeres judias no entran a la sinagoga, porke por eyas es defendido (prohibido). Tambien raramente salen de sus kazas, sino para vijitar alguna amiga kristyana.»»»
Es interesante ke los postos ofisiales (komo por egzempio el traduktor personal del rey) pasavan en erensia, se eredan de padre a ijo, o a otro miembro de la famiya.
Esta fue una de las razones del viaje ke izo Yaakov Kansino a Madrid en 1634.
El se prezento ande el Konsilio del rey a konvenserlos ke anel es ke le reviene eredar el posto de su ermano Aaron ke murio durante su empiego.
Apropo, siendo ke el titolo «tradjuman del rey» no egzistiya ofisialmente, dunke, el Konsilio nomino un komite a abediguar esta kestion.
Al komite, les tomo algunos tredje anyos a desidir en favor de Yaakov Kansino.
En 1638, una vez mas en Madrid, Yaakov Kansino depozito en la impremeria de Fransisko Martinez la traduksion al kastiliano del livro «Extremos i Grandezas de Constantinopol» eskrito en ladino (kon letras de Rashi) por Moshe Almosnino, el rabino de Salonik.
Este livro de Almosnino es en realidad la treser parte de una trilogia (tres livros) sovre la estoria de los reyes otomanos.
Fue esta una ozadia de parte de Kansino a publikar este livro, eskrito por un rabino judio en una monarhia katolika. Ma malgrado todo la senzura espanyola dyo su permision de imprimirlo, dando la razon ke es un livro informativo i nada mas, igual komo los livros del istoriador romano Tacitus (56-117) aun ke Tacitus avlava mucho kontra los primeros kristianos.
****
Es posivle ke durante toda mi konferensia avia deskrivido la istoria de la komunidad en Oran en kolor un poko roze.
Ma es verdad ke kaje del empesijo de la egzistensia de esta komunidad avian muchas provas de echarlos de Oran.
A vezes de parte de la inkizision, a vezes de parte de algunos faktores kompetitores.
De toda manera, los judyos reusheron en kada vez de topar la proteksion sea en konvensiendo al governador de Oran o al rey mizmo, o a su konsejero, etc.
Me akodro en la eskola primaria, kuando ambezimos sovre la destruksion de Pompeii en un desbrocho del Volcan Vesuvio.
De mi para mi, me demandava, komo podian djente eskojer/elijir a bivir en los deklives de un Volkan.
Los anyos me dieron a saver ke esto pasa todo el tiempo, en todos los lugares del mundo, i no solamente sovre un volkan vizible.
El destino de los judyos de Oran se abolto de boka abasho en Avril 1669. Fue esto djustamente lo ke uzamos a dizir «la istoria se repite».
Una reina espanyola, Mariana de Austria, la bivda del rey Felipe IV, sinyo el dekreto de la expulsion de toda la komunidad.
De la noche a la maniana se desparesio todo lo ke fue logrado durante 160 anyos de konvivensia judea-kristiana.
La komunidad entera. de grande asta chiko. fue ovligada a partir a los princhipatos italianos Saboya i Toscana.
Ma, komo okurio todo esto?
En el 12 de Novembre 1656, ordeno el rey Filipe IV a estabeleser un komite espesial («la Junta de las cosas de Oran») para egzaminar los argumentos del Markiz de San Roman, demandando la expulsion de los judyos de Oran.
En esta Junta «ad oc» se adjuntava el inkizistor prinsipal, el teologo Fransisco de Gamboa, el Markiz de-Velada (ex-governador de Oran, i mas.
Es interesante ke uno de los argumentos del Markiz San Roman fue bazado sovre un raporto del veedor de las komanias de la sivdad, dizyendo ke la konsumasion grande de sereales por los judyos kavza un aumento intolerable de los presios.
Segun el raporto del veedor, las frutas de los bustanes al derredor de Oran, i tambien la peshka ke viene de Mars el Kebir, es bien sufisiente para los kristyanos, si (mijor) los judyos desharan el lugar.
Este dato puede ser un faktor importante en tiempo de gerra i en kavzo de algun asedio sovre la sivdad de Oran.
Naturalmente ke aparesyo el argumento de los papazes, keshandosen de las relasiones amigavles entre judyos i kristyanos. Segun eyos, ay perikolo ke se ambezaran las kostumbres de los judyos, i tambien, ke en la sinagoga se ensenyan lisyones de Talmud ke kontiene difamasiones kontra el kristianizmo.
No mankavan tambien raportos sovre la situasion ruinoza de las kazas de los kristyanos, mientras los judyos son todos bien rikos, i tienen la posibilidad de azer renovasiones en sus kazas.
Todos estos raportos no eran argumentos solidos en favor de la expulsion de los judyos, ma reflektan klaramente el selo permanente (asta OY!) ke tienen los Goyim frenete sus vizinos judyos.
Ma, de la otra parte en las reuniones del komite/ La Junta, se sintiyan i argumentos kontra la espulsion:
Kien podra remplasar el servisio de los judyos komo traduktores i konsejeros.
Las informasiones valutozas (ekonomikas i afilu militar) ke trayen los judyos grasias a sus kontaktos kon los paizes musulmanos.
El konsilio (El Konsejo) de la Gerra se opozo afilu a la idea de alguna expulsion parsiala.
Na una sitasion de uno de los raportos:
El numero de los judyos no era nunka tan alto para ser alguna razon para prepokuparmos.
Sus negosyos i sus komersio son rentables; i en tiempos de apreto, los presidios (las sivdades rodeadas de muraya) estaran en peligro si no el apoyo de los judyos kon dinero i komania (provizion / abastision), etc.
El fato es ke todos estos debates PRO i KONTRA, kontinuaron i turaron algunos 13 anyos.
Ma, el evento ke provoko mas de todo la kestion de la expulsion, fue la muerte de Yaakov Kansino en 1666.
Yaakov era el tradjuman official del reino, un posto ke paso de padre a ijo por muchas dekadas.
Por achak de esta muerte, empeso el governador de Oran, el Markiz de los Velez unos pasos bien planeados para expulsar a los judyos de la sivdad.
No savemos ke pusho a este governador a adoptar una atitud tan anti-judia, ma no es koza mueva en muestra istoria.
«Ya mos se izo kayo» komo uzavan a dizir muestras madres.
El Markiz de los Velez izo durante tres anyos sus esforsos de desbarasarse de los judios, ma lo izo kon mucha kapachedad i diplomasia prudente.
Por egzempio, el disho buenas palavras sovre Hayim Kansino, ma en la mizma ora, el disho komo un apropo, ke ay i tradjumanes kristianos ke son komptentes de kumplir el posto de tradjuman de la reina.
En una de las ojas ke vos di endagora, toparesh la letra ke eskrivio Hayim Kansino al rey, exortandolo al rey i implorando por su niminasion de tradjuman.
Hayim Kansino fue nominado komo tradjuman, por no dar a saver a los judyos ke se esta diskutiendo la kestion de expulsar a todos los judyos de Oran, i de verdad, durante todo este tiempo no salyo ni una palavra afuera de las reuniones del komite, o del Konsejo de Gerra, etc.
El dekreto de la expulsion se dyo en el mez de Marso 1669, segun el, todos los judyos desharan a Oran en el 8 de Avril 1669, aparte de tres o kuatro judyos ke kedaran en Oran sin sus famiyas para okuparsen de la likidasion de todos los bienes de la komunidad.
Se aparejaron kuatro vapores, ke yevavan un renforso, un adjustamiento de fuersa militar, en kavzo ke los judyos se ivan a revoltar.
Por kavzo de una fortuna/tempesta en la mar, la expulsion tomo lugar en el 16 de Avril, kon mucho dubara, askieres, trompetas i las kampanas de las iglesias.
Todos los judyos suvieron al vapor ke teniya de yevarlos al princhipato de Saboya (este territorio es kompartido oy entre las republikas modernas de Italia, Fransia i Suiza).
Los aires fuertes no permetieron a partir, ni abashar del vapor; asta la semana santa de la Paskua.
El uniko ke abasho del vapor fue Yitzhak Kansino, no otro ma el ermano del Rav Avraham Kansino, ke desidio de konvertirse.
Ke verguensa.
La primera destinasion del vapor fue el porto de villaFranche-de-Nice, ayi aksepto el Duke de Saboya a resivir a los rikos de entre los judyos venidos.
Los otros se instalaron en Milano.
Unos kuantos mezes despues, a la demanda de la Reina Mariana se dediko una iglesia al nombre de «Jesus de la Pasensia» en el lugar ande era antes una sinagoga.
De toda manera kon la expulsion de los judios de Oran se termino la epoka (o la idea) de «Espania de las tres kulturas».
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
