La boz de Yehuda: El «piropo» espanyol por Yehuda Hatsvi

En estos dias salyo a luz un livro muevo, (en ebreo), en la Edision de Yad Ben Zvi, Yerushalayim. El livro es un fruto de investigasion de la Dra. Nina Pinto Abcasis dbm (ke mos desho la vida en julio 2019 a la edad de 48 anyos). El sujeto del livro es “Tetuan: un sitio de enkontro entre tres kulturas”.

Es muy interesante meldar sovre las diferensias ke egzisten entre las tres kulturas (la judia, kristiana i musulmana), i tambien kual fue el “ponte” ke las aunavan.

En el livro se mostran varios aspektos de las interaksiones interkulturales, de las seremonias, las ekspresiones poetikas, de la kaye, i en el lenguaje de la haketia.

Ma, oy vos kero avlar, en kurto, sovre el termino “piropo” ke no lo avia konosido asta estos dias, i por el kual se avla en detalyo en el livro de la Dra. Nina Pinto Abcasis.

El piropo espanyol es kompuesto de una metafora o djugo de palavras, lo mas en alguna relasion al puerpo de mujer. Estas ekspresiones se kulaneavan en Espania komo un uzo folkloriko akseptado para kurtizar i para komplimentar.

Kuando arrivaron los kristianos-ispanos a Tetuan, la kapitala del proktorato de Maroko Espanyol (1912-1956), eyos trusheron la kostumbre de “piropear” en este muevo espasio jeografiko tambien.

Unos kuantos enshemplos de piropos:

* Si tu kuerpo fuera karsel, i tus lavios kadena, ke bonito lugar para pasar mi kondena.

* Veneno ke me dieras, veneno tomava yo.

* “I love You” en ingles, “Ti amo” en italiano, pero “a ti te kiero”, te lo digo en ladino.

* Bueno! mi madre nunka me disho ke las flores andavan…

* Me gusta el kafe, pero preferia tener-TE.