eSefarad Noticias del Mundo Sefaradi
Ver todos los artículos de esta sección
El Estado de Israel es un pais chiko. Su area es 22 mil kilometros kuadrados, ke son una chika parte de lo ke uzamos a yamar “La Tierra Prometida”. Oy, (2022), biven en Israel 9.290 milion abitantes, entre eyos 6.870 milion (74%) son judios.
Desde antes mas de 3200 anyos ya bive muestro puevlo en este pais.
Malgrado las ekspulsiones ke sufrimos (desde el anyo 733 ante el kontado sivil) por mano de Asiria, Babilonia, i el Imperio Romano, siempre bivieron aki judios, i siempre, sin sesar, durante toda la epoka del Exilio, se atrevieron judios a venir a bivir en este pais, aun ke en numeros no grandes.
En el siglo 19, se mijorearon las kondisiones geopolitikas en el mundo, lo ke kavzo mas posibilidades a realizar la aspirasion i el dezeo de “tornar a Zion”. Ansi, empesaron a venir mas i mas djudios a la tierra santa, i ayinda mas kontunean a venir Olim de todas partes del mundo.
No se. No se, ma kiero kreer, ke se esta empesando a realizar la prometa divina eskrita en la Tora:
“Si uvieres sido empushado asta el kavo de los sielos, de ayi te rekojera Adonay tu Dio i de ayi te tomara, i te trayera Adonay tu Dio a la tierra ke eredaron tus padres, i la eredaras.” (Devarim 30,4).
Entre los abitantes judios biven en Israel, ay 40000 judios karayim/karaitas.
En el siglo 8 se fondo el movimiento karaita por el Haham Anan Ben David.
Los karaitas kumplen todas las Leyes eskritas en la Tora, ma no adoptaron la “inetrpretasion” de la Tora (i la ke yamamos Halaha) segun eskrita en el Telmud.
Por un solo egzempio, los karaitas uzan a poner sovre la tsitsit del Talet un kordon/fitil de kolor siel/cheleste, komo mos komanda la Tora:
“Para ke vos akodresh, i agash todas mis enkomendansas vos akodresh mis enkomendansas, i seash santos a vuestro Dio”. (Bamidbar 15,38).
Los judios, en jeneral, neglijan de kumplir esta Mizva por kavza de muestros Hahamim ke no yegaron a konkluzion de kual karakol marino se ekstrakta la boya/la kolor del “kordon cheleste”…
Malgrado las kostumbres diferentes, oy, en Israel egzisten kazamientos entre los judios “rabinikos” i los judios karaitas.
Permetedme agora dedikar aki tres-kuatro linyas, i avlar por un chiko grupo de djente (no mas de 800 almas), ke biven en Israel i en el territorio palestino.
Este grupo, los Shomronim/Samaritanos, son desendientes de los trivos de Levi, i de Efraim i Menashe, el resto presiozo del antiguo reynado de Yisrael.
La lingua de los samaritanos asemeja al ebreo antiguo. Eyos guadran kon severidad la Ley de Moshe segun el livro antiguo de la Tora, ke tienen kon eyos, bien guadrado.
Eyos fiestan solamente las fiestas i los Moadim mensionados en la Tora. Naturalmente ke sus kostumbres son diferentes de lo ke fiestamos los judios.
En el proseso de la ‘historia, desbrocharon (entre los judios i los samaritanos) diferensias sovre baza de relijion. Antes mas de 2500 anyos fue, kisas, posivle de aunarlos a un puevlo kon los judios, ma no reusho realizarse.
Mas de 400 samaritanos biven oy en Holon, Israel. La otra metad de este puevlo chiko bive en una aldea sovre el monte santo de Gerizim (ke en el territorio palestino).
Apropo, los samaritanos yevan en el Talet, un fitil de kolor cheleste (segun nos komanda la Tora).
(A kontinuar)
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
