La boz de Yehuda: La povlasion de Israel (2) por Yehuda Hatsvi

Despues de la muerte de Moshe Rabenu, antes kaje 3300 anyos, gerrearon los 12 trivos de Yisrael a konkistar i eredar la Tierra Prometda. Sus sukseso fue solo parsial: ayinda kedaron territorios ke kedaron en mano de varios puevlos komo los filisteos, los kenanitas, i mas.

Dunke, en todas las epokas de la estoria bivian judios en Erets Yisrael (a vezes komo una minorita desmizeriada), ma -de la otra parte- siempre siempre se instalaron en este pais muchos estranjeros de varios puevlos i varias relijiones.

De kuando surjio al mundo la relijion islamika, en el siglo 7, empesaron los aderentes de Isalm en un gran entuziasmo de gerras kon el nombre del Islam, i reusheron konkistar muchos paizes en el Medio Oriente (inkluye Erets Yisrael) i Evropa.

En el los primeros anyos del siglo 11 aparesieron las Kruzadas evropeas kon el buto de konkistar a la Tierra Santa. Eyos reusheron a estabeleser sus “Reynado de Yerushalaim” i dominar, kon el tiempo, sovre otros territorios en Erets Yisrael. Ma, en 1290, fueron vensidos totalmente por las poderozas armadas de los musulmanas.

Oy, 2022, basho las alas del Estado de Israel, tenemos 1956000 sivdadinos arabos (mas de 20% de la povlasion total). Lo mas de los arabos musulmanos del paiz son Sunitas mientras la mas chika parte son Shiitas.

Algunos mas de 100000 beduinos (arabos nomados/vagabundos) son sivdadinos de Israel. Todos los trivos beduinos son musulmanos.

Desde los ultimos anyos del siglo 19 empesaron los beduinos del pais a trazladarsen a la kultivasion agrikola.

Este proseso esta kontinuando bien en Israel. Una grande parte de los beduinos en Israel se mobilizan a la armada del paiz.

El numero de sivdadinos kristianos en Israel es 175000 almas (80% de eyos son de raizes arabas). Ma, biven en el paiz unas kuantas komunidades chikas de varyas sektas kristianas.

Jeneralmente, la situasion de la ekonomia, komo el nivel de edukasion de los arabos kristianos son mas buenas ke de los musulmanos.

Ademas, en Israel biven algunos 35000 sivdadinos kristianos de kaje todas las sektas kristianas (katolikos, protestantes, pervoslavos, etc.).

Entre los sivdadinos arabos tenemos tambien una komunidad etnika separada: los Drusos. 120000 drusos biven en Israel, lo mas en las areas altas del Galilea i el Karmelo. La relijion de los drusos es unika i sekreta. sus relijion surjio, (en el siglo 11), mezo su profeta El-Hakem, i se despartio del Islam.

Los drusos dizen ke son desendientes de Yitro (el suegro de Moshe Rabenu), eyos respektan los 10 mandamientos, ma tambien a todos los yamados profetas: Moshe, Jesus i Mohamed. Los drusos son monogamos. Tambien, no akseptan resivir korelijionarios muevos. Todos los drusos de Israel kumplan askerlik igual komo los sivdadinos judios.

En Israel tenemos tambien 4000 sivdadinos Cherkasianos (Cherkesim) ke biven en dos kazales (Rehania i Kama) en la area del Galilea. Los Cherkasianos son orijinarios del Kaukaso. Kon la konkista del Kaukaso por los rusos (en el siglo 19), imigraron muchos Cjerkasianos al Medio Oriente (inkluye Erets Yisrael). Los Cherkasionos paganos se konvirtieron al kristianizmo en el siglo 6, ma se konvirtieron al Islam sunita en el siglo 15. Todos los Cherkasionos de Israel sierven askerlik igual komo los judios i los drusos.

…I todo lo ke vos avia kontado aki, karos amigos, es solamente una parte parsial del “mozaiko” umano de la povlasion de Israel.

Semanada buena i klara !