eSefarad Noticias del Mundo Sefaradi
Ver todos los artículos de esta sección
Esta tadre, noche de Tu biShvat, mos asentaremos kon alegria al derredor de la meza a selebrar muestra fiesta de las frutas.
Tu biShvat esta mensionado en el Talmud komo Rosh haShana de los arvoles, i me parese ke -entre otras razones- es un sebep (motivasion), a olvidar por un momento muestras okupasiones diarias i salir i ver la natura, los arvoles, las flores, i todo lo ke kreo el Dio Baruh U en su mundo, para trankilizar muestros korasones.
En Tu biShvat, en 2011, organizo la ANL (Autoridad Nasionala del Ladino i su Kultura) un enkontro grande de sienes de ladinoavlantes. El enkontro tuvo lugar en el parko de Neot Kedumim, en el kual una gia mos dyo a konoser varyas dozenas de arvoles, plantas i flores.
El maraviyozo mundo de la natura!
En akel enkontro plaziente, topi la okazion de kantar al publiko mi kantigita sovre la fiesta de las frutas.
(la melodia es de un kante grego olvidado).
Aki, podesh i vozotros todos eskucharlo:
El teksto del kante lo tenesh aki mas abasho.
Ayinda mas, me alegro trayervos aki la perfekta performansia de la kantiga por muestra Liliana Benveniste kon su dulse boz!
Fiesta alegre!
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
