eSefarad Noticias del Mundo Sefaradi
Ver todos los artículos de esta sección
Una mujer djovena, rezin kazada, se alevanto una maniana i empeso komo kada dia, a azer los echos de kaza: barrer, espondjar, meter komer a lumbre, lavar i enshaguar.
Las oras pasan, ya esta kaje de mediodia, i la buena mujer se va a la kuzina a ver si ya esta pronto su gizado. De verdad, ke de tantas oras ke pasaron desde el kafe de la maniana, ya teniya la novia bastante ganas de komer.
Tomo un chini/plato, i se lo incho del gizado ke era, parese, papa de fijon (o si keresh – papa de avas).
Ayinda kon el chini en la mano, i na ke dieron a la puerta; (el soneri/soneria no funksiono akel dia).
Korryo la mujer a avrir, i a la puerta aparese su suegra, bien vistida, ke vino a una vijita supitania/apansiz.
– «Ke», disho la suegra en viendo a su nuera kon el chini en la mano «Ke, para ti es esta toda PA-PA-RRRRA?!»
– «No» disho la nuera, kon una djentileza: «es para VOS mi suegra, ke venish kansada».
– «Ah», disho la suegra kon mushos/lavios i boka kaje serrados, «para mi es esta paparika?»
* * *
( I ayinda mos kontan ke es el profesor Einstein el ke envento la teoriya de la relatividad !…).
“Aluenga/lengua blanda kevranta al gueso”.
(Mishle 25, 15)
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
