eSefarad Noticias del Mundo Sefaradi
El filmo ke viene de salir «Saving Mr.Banks» tratando de la istoria de «Mary Poppins» fue djugado tan bueno ke me fui a verlo 2 vezes. No savia antes ke la istoria de Mary Poppins se avia pasado en la Australia al empesijo del Siglo 20.
Disney Land fue un lugar ke me atiro munchas vezes sea en California, Tokyo o Paris. En un viaje oyi ke el Senyor Disney fue entezado a su muerte para ke lo despierten en 100 anyos esperando de ser animado. Este artikolo ke salio en el Jewish News de esta semana mos konta kozas ke no savia. Fue Rafael Medoff ke lo presento.
Saludes a todos.
ERA WALTER DISNEY UN ANTI-SEMITE?
La artista bien konosida Meryl Streep alumbro de muevo un debate ke egzistia desde dekadas en Hollywood i ke fue olvidado. Se demandavan en el tiempo si Walter Disney era un Anti-Semite. Se paso en la okazion de dar los premios del Organismo de Filmos i se topavan ayi los produktores, estudiantes i eskolares. Meryl Streep presento el premio a Emma Thompson por el rol ke djugo en el filmo «Saving Mr.Banks».
P.L.Travers era en realidad la eskrivana ke eskrivio una seria de los livros sovre Mary Poppins i esto avia interesado muncho a Walter Disney. El keria azer un filmo de estas istorias i trayer en vida a los personajes. la eskrivana no keria ke sus istorias se tornen en animasiones. El rol de Walter Disney fue djugado por Tom Hanks i los dos izieron un filmo de maraviya.
Streep disho ke Walter Disney en realidad era un ombre rasisto i misojinisto. Uno ke soportava la industria Anti-Semite. Munchos pensaron ke esto keria dizir ke era seksisto,rasisto i Anti-Semite. El Akademiko David Hadju komento diziendo ke El Senyor Disney tenia munchos puntos negativos komo persona. Misojinisto? «Si». Anti-Semite? «Si».
Un istoriano de Hollywood, Neal Gabler, egzamino esta karga de ser Anti-Semite en su biografia de 2006 i disho «Entre los Judios ke lavoravan por el era difisil topar unos ke pensavan ke Disney era un Anti-Semite. Los mas grandes artistos eran Judios. El empleava mas Judios ke kualkier estudio. Disney tenia mas Judios en la ofisina de New-York ke en Leviticus.»
Del otro lado se avia oyido a Disney azer remarkas kontra los Judios. Avia echado mismo a uno afuera.
Kuando se trata de tener prova ke de verdad Disney era un Anti-Semite, el eskrivano de «Multi Culturalism And The Mouse» i «Race,Sex In Disney Entertainment» dize «No egziste una prova ke Disney disho kozas Anti-Semites en publiko i en privado.Disney se servio mas de artistos Judios en su estudio komparando kon los otros. Disney azia donasiones a las karidades Judias i inkluian al Orfelinato i a la Yeshiva College.
La kestion se poza, komo fue ke salieron tantos rumores i ke se espandieron. A este punto Meryl Streep entra en diziendo «Ay una industria de Anti-Semitismo ke aze una mala propaganda. Disney estava asosiado kon «Motion Picture Alliance For The Preservation Of American Ideals» [MPA]. El buto de este grupo era de meterse kontra los Komunistos, Fashistos i Grupos Totalitarios, para ke no metan eyos los pies en Hollywood. Entre estos miembros avian artistos grandes komo John Wayne, Clark Gable, Ginger Rogers ets. Unos entre eyos eran Anti-Semites de manera privada. Kisas la kulpa de Disney era de ser asosiado kon esta djente. Puede ser ke lo savia i lo ignorava.
Tradusido por Shimon Geron. Sydney
FILM TIRYAKISI.
